மூளை என்பது பிளாஸ்டிக்கை போன்றதா?

 அறிவியல் கேள்வி பதில்கள்
மிஸ்டர் ரோனி

மூளையை பிளாஸ்டிக் என்று கூறுவது ஏன்?

மூளை, ஒருவர் பெறும் அனுபவங்களைப் பொறுத்து தன்னை வடிவமைத்துக் கொள்கிறது, பரிணாம வளர்ச்சி பெறுகிறது. இதன் காரணமாக அதை பிளாஸ்டிக் என்று கூறுகிறார்கள் 

மூளை இளம் வயதில் எப்படி மாறுகிறது?

பிறக்கும்போது குழந்தைக்கு மூளை 350 கிராமாக உள்ளது. பின்னர், வயது வந்தவராக மாறும்போது அதன் எடை 1450 கிராம்களாக மாறுகிறது. பிறக்கும்போது மூளையில் நியூரான்களின் தொடர்பு முழுமை பெற்றிருப்பதில்லை. வயது வந்தோராக மாறும்போதுதான் அதன் முழுமையாள வளர்ச்சி நிறைவுபெறுகிறது. 

மூளையை ஆரோக்கியமாக பாதுகாப்பது எப்படி?

மதுபானம் அருந்தக்கூடாது. அடுத்து, உடல் எடையை கட்டுக்கோப்பாக பராமரிக்க வேண்டும். புகைப்பிடித்தல் கூடாது. உடற்பயிற்சியை தினசரி செய்யவேண்டும். அடிப்படையாக மூளையில் டிமென்சியா போன்ற நோய்கள் வரக்கூடாது என்றால், அங்கு ரத்தவோட்டம் சீராக இருக்கவேண்டும். குழந்தையாக இருக்கும்போது பல்வேறு மொழிகளைக் கற்பது எளிது. நடப்பது, பேசுவது, சமூக வாழ்க்கையை புரிந்துகொள்வது, எழுதுவது, வாசிப்பது ஆகியவற்றை செய்யமுடியும். இதையெல்லாம் தொடக்கத்தில் கற்காமல் வளர்ந்த பிறகு கற்பது கடினம். 

உடலிலுள்ள செல்களைப் போலவே மூளை செல்களும் இறக்குமா?

நிச்சயமாக. வயதாகும்போது பழைய செல்கள் இறந்தாலும் புதிய செல்கள் உருவாவது தாமதமாகும். 

பாண்டம் லிம்ப் பெய்ன் என்றால் என்ன?

ஒருவருடைய கை விபத்தில் சிக்கி துண்டிக்கப்பட்டுவிட்டால், அதை மருத்துவர்கள் அகற்றினார்கள் என்றே வைத்துக்கொள்வோம். அதைபற்றி மூளை அறியாமல் துண்டிக்கப்பட்ட கை வலி, வேதனையில் இருப்பதைப்போல உணரும். இதற்கான சமிக்ஞைகளை உடல் மூளைக்கு அனுப்ப, இதன் விளைவாக வலி உணர்வை நோயாளி அனுபவிப்பார். கையை முற்றாக இழந்தவர் விரல்களை அசைப்பது போல உணர்வதும் கூட மூளை செய்யும் மாயாஜாலம்தான். பாண்டம் லிம்ப் பெய்ன் என்பது போலியான வலி. உண்மையானது அல்ல. 

காதல் வேதிப்பொருட்கள் எவை?

ஆக்சிடோசின், வாசோபிரசின் என்ற இரு வேதிப்பொருட்களை காதல் வேதிப்பொருட்கள் என்று கூறலாம். இவை இரண்டுமே குழந்தைகளை வளர்ப்பது, பாலியல் உச்ச இன்பம் அடைவது, உணர்வு ரீதியான தொடர்பு கொள்ளுதல் ஆகியவற்றுக்கு காரணமாக உள்ளது. 

போதைப்பொருட்கள் மூளையை எப்படி பாழ்படுத்துகின்றன?

மூளையிலுள்ள பல்வேறு நியூரோடிரான்ஸ்மிட்டர்கள் செய்யும் வேலையை போலியாக போதைப்பொருட்கள் செய்கின்றன. இதனால் இயல்பாக வேலை செய்யும் உறுப்புகள், தம் செயல்பாட்டை நிறுத்திக்கொள்கின்றன. எனவே, மூளை மெல்ல செயலிழக்க மந்தமாக தொடங்குகிறது. இதற்கு மூலகாரணமாக மரிஜூவானா, கோகைன், ஹெராயின், எக்டசி, மதுபானம் ஆகியவற்றைக் கூறலாம்.