சமூகப் புரட்சியை தொடங்கி வெற்றி பெறுவது பற்றி விளக்கும் நூல்!

 

 ஏபிசி ஆப் அனார்சிசம்
அலெக்சாண்டர் பெர்க்மன்
ப.108

அனார்சிசம் என்பதை தலைவர் இன்மை, அல்லது அரசின்மை என்று கூறலாம். அந்த வகையில் அரசு இல்லாமல் நாடு எப்படி செயல்பட முடியும், அதன் சாத்தியங்கள் என்ன என்பதைப் பற்றி இந்நூல் ஆராய்கிறது. பொதுவாக, புரட்சி என்பதை முதலாளித்துவ ஊடகங்கள், குறிப்பாக ஆரியர்கள் நடத்துபவை, தவறாக சித்திரித்து வந்திருக்கின்றன. அப்படியான பல்வேறு பிரச்னைகளை முதல் இரண்டு அத்தியாயங்களில் நூல் எடுத்தாண்டு, பிறகு பேசும் மையப்பொருளுக்கு வேகமாக நகர்ந்துவிடுகிறது.

நூலில், அரசின்மை கருத்துகளை விளக்கிய முக்கியமான தலைவர்களின் பெயர்கள் குறிப்பிடப்படுகின்றன. அவற்றை வாசகர்கள்தாம் தேடிப் படித்துக்கொள்ளவேண்டும். எடுத்துக்கொண்ட மையப்பொருளை விவரிக்க அதிக நேரம் தேவை என்பதால் எழுத்தாளர் அலெக்சாண்டர், முக்கிய சிந்தனையாளர்கள் பற்றி அதிகம் விளக்கவில்லை.

கட்டற்ற ஆராய்ச்சி, ஆய்வு வலைத்தளங்களில் அனார்சிசம் பற்றி தேடினாலே ஏராளமான கட்டுரைகள், நூல்களின் சில பகுதிகள் இலவசமாக வாசிக்க கிடைக்கின்றன. அவற்றைப் படித்து ஒருவர் இத்தத்துவத்தை நன்றாக புரிந்துகொள்ள முடியும்.

நூலில் தொழிலாளர்கள் மீது அதிக கவனம் செலுத்தப்பட்டுள்ளது. அவர்கள் தொழிற்சாலையில் பணிபுரிந்துகொண்டு புரட்சிக்கும் எப்படி பங்களிக்க முடியும், அதன் சாத்தியங்கள் பற்றி விவரிக்கும் பகுதி வாசிக்க சுவாரசியமானது தகவல் தொழில்நுட்ப காலத்திலும் உற்பத்தித்துறை தொழிலாளர்கள் முக்கியமானவர்கள்தான். நூலில் கூறுவது போல போராட்டத்தை தொடங்குவது எளிது. ஆனால் அதை நடத்த தளபதி போன்ற தொழிலாளர் தலைவர்கள்தான் இல்லை. பலரும் கறைபடிந்தவர்களாக, பிடுங்கி தின்னும் ஓநாய்களாக உள்ளனர்.

சமூகப் புரட்சி என்றால் என்ன, அதை எப்படி நடத்துவது, அதன் பின்விளைவுகள், தொழிலாளர்கள் நெருக்கடியை எப்படி சமாளிப்பது என ஏராளமான விளக்கங்கள் நூலெங்கும் கொட்டிக் கிடக்கின்றன. கூடுதலாக, வன்முறையை எப்படி கைக்கொள்வது, கையாள்வது, அதிலுள்ள சித்தாந்த முரண்கள் பற்றியும் தெளிவாக விளக்கியுள்ளது அருமை.

ஒரு நாடு சர்வாதிகாரத்தில் வதைபடும்போது, புரட்சிக்கான இயல்பான காரணங்கள் உருவாகின்றன, மேலாதிக்கத்தை, அடக்குமுறையை தொழிலாளர்கள், விவசாயிகள் எப்படி ஒன்று திரண்டு ஒழிக்க முடியும் என நூலில் எழுத்தாளர் அலெக்சாண்டர் விளக்கியுள்ளார். அரசின்மை பற்றிய தெளிவான விளக்கங்களைக் கொண்டுள்ள நூல்.
கோமாளிமேடை குழு