ஒருவரை நினைத்தால் அவரை பார்க்கமுடிவது தற்செயலானதா? டெலிபதி உண்மையா? பதில் சொல்லுங்க ப்ரோ?

 

 

 

 

telepathy pxhere

 

 

 

 

டெலிபதி என்பது உண்மையா?

சக்திமானில் கங்காதர் கூட கீதா விஸ்வாசிடம் டெலிபதியில் சில செய்திகளை பகிர்வார். ஆனால் இது உண்மையா என்றால் அறிவியல் ஆதாரங்கள் இதற்கு ஏதும் இன்றுவரை வரை கிடையாது. இஎஸ்பி என்பது ஐம்புலன்களை கடந்த ஒன்று. கிளார்வயன்ஸ்  என்பது குறிப்பிட்ட இடம் பற்றிய செய்தியை அறிந்து சொல்வது. இது இயல்பான மனிதரின் திறனுக்கு அப்பாற்பட்டது.

டெலிபதிக்கான உதாரணங்களுக்கு அமெரிக்கா, ஐரோப்பா இம்முறை செல்லவேண்டாம். நீங்கள் சந்தித்து பேசி பத்தாண்டுகள் இருக்கும் எனும்படியான நபரை திடீரென நினைப்பீர்கள். அடுத்த ஐந்து நிமிடத்தில் உங்களுக்கு வரும் போன் அழைப்பில் அதே நண்பர் உங்களை அழைத்து நலம் விசாரிப்பார். இவரை சந்திப்போமா என்று நினைத்துக்கொண்டு இருப்பவரை ஹைப்பர் மார்க்கெட்டில் சந்தித்து குஷியாவீர்கள். உறவினர் ஒருவரை சந்திக்கவேண்டும் என நினைத்துக்கொண்டே கதவைத் திறப்பீர்கள். எதிரே புன்னகையுடன் அவர் நிற்பார். இதுபோலான சம்பவங்கள் பலரது வாழ்க்கையிலும் குறிப்பிட்ட காலத்தில் நடந்திருக்கும். இதனை தற்செயலாக கருதுவதா, அதிசய சக்தி ஒருவருக்கு கிடைத்துள்ளதாக என்றெல்லாம் கூறமுடியாது.

மனதை குவித்து ஸ்பூனை வளைப்பவர் என்று உரி கெல்லர் என்ற இஸ்ரேல் ஆங்கிலேயர் ஒருவர் பிரபலமானார். ஆனால் பின்னாளில் அவர் சொன்னது அத்தனையும் புருடாவானது. இன்றும் மார்வெல் காமிக்ஸில் வரும் நாயகர்களை ஒத்த திறன் கொண்ட மனிதர்கள் சிலர் உலகில் வாழ்கின்றனர்.

ஆனாலும் கூட ஒருவர் தன் மனதில் நினைக்கும் செய்தியை இன்னொருவருக்கு கடத்திவிட முடியுமா என்றால் அதற்கு பதில் கிடையாது. அறிவியல்பூர்வமான ஆதாரமும் இல்லை.