சூதாடி டைகரின் சோம்பலான காமிக்ஸ்! - என் பெயர் டைகர்!

என் பெயர் டைகர்

லயன் காமிக்ஸ்

ஜீன் கிராட்

ரூ.250


1881 ஆம் ஆண்டு நடைபெறும் சம்பவங்களைக் கொண்ட டைகர் காமிக்ஸ். இதில் டைகர் பெரும்பாலும் எந்த சண்டைகளிலும் ஈடுபடவில்லை. மொத்த விஷயங்களையும் செய்வது, அபாச்சே ஜெரோனிமா, பிடாரி மா க்ளண்டன், ஸ்ட்ராபீல்டு ஆகிய துணை கதாபாத்திரங்கள்தான்.

அதிலும் டைகரின் கதை எழுதவரும் கேம்ப்பெல் கூட இருவரைக் கொல்கிறார் என்றால் பாருங்களேன். காமிக்ஸ் படிக்கும்போது, டி.ஆர் படம்போல ஜூனியர் கேரக்டர் எல்லாம் பன்ச் பேசுதே என எண்ணுவீர்கள். அனைவருக்கும் வாய்ப்பு கொடுத்திருக்கிறார் ஆசிரியர் என நினைத்துக்கொள்ளுங்கள் அவ்வளவுதான்.

இதில் பின் யார்தான் நாயகர் என்கிறீர்களா? ஏர்ப் சகோதர ர்கள்தான். டூம்ப்ஸ்டோன் நகர மார்ஷல்களுக்கும், க்ளண்டன் மற்றும் மெக்லெரி குழுக்களுக்கும் நடக்கும் உள்முக, மறைமுக பழிவாங்கல்தான் கதை. இதில் டைகர் தன் காதலியும் பாடகியுமான டோரிக்காக சீட்டுக்கட்டை கடாசிவிட்டு உள்ளே வருகிறார். வில்லன்களை காயம்பட்டாலும் போட்டுத்தள்ளி இறுதியில் சீட்டு விளையாடுகிறார்.


முக்கியமான பகுதி, கேம்ப்பெல்லுக்கு சொல்லும் தனது வாழ்வு குறித்த பகுதிகள்தான். செவ்விந்தியர்களை அனைவருமே வில்லனகளாச் சித்தரிக்க, டைகர் மட்டுமே அவர்களை நேசிக்கிறார். தன் மேலதிகாரியிடமே நாம் செய்வது தவறு என பேசுகிறார். இதனால் செவ்விந்தியர்களின் தலைவரான ஜெரோனிமோ டைகரை கொல்லாமல் விடுவதோடு, அவரிடம் உதவியும் கோருகிறார்.


ஜெரோனிமாவுக்கென தனி அத்தியாயமும் உள்ளது. நேர்த்தியாக அவரது வாழ்க்கையை பதிவு செய்துள்ள காமிக்ஸும் கூட.

டைகர் காமிக்ஸில் நாயகத்துதி இல்லாமல் இருப்பது படிக்க நன்றாக இருக்கிறது. கதை பெரும்பாலும் டூம்ப்ஸ்டோன் நகரை விட்டு அதிகம் வெளியே நகரவில்லை. அதிலேயே ஓவியத்தில் அத்தனை பிரமாண்டம் காட்டிவிட்டனர். வீக் எண்ட் வாசிப்புக்கு சூப்பரான காமிக்ஸ் என்பதில் எந்த சந்தேகமும் வேண்டாம்.


- கோமாளிமேடை டீம்

நன்றி: ஓவியர் பாலமுருகன்