அமைதி திட்டங்கள் பயனளிக்குமா?

கொரியாவில் அமைதி திட்டங்கள்!

அணு ஆயுத திட்டங்களை கைவிட ஒப்புக்கொண்ட வடகொரியாவுடன் இணைந்து செயல்படும் பல்வேறு பொருளாதார திட்டங்களை மூன் ஜே இன் உருவாக்கியுள்ளார். இதில் இரு கொரிய நாடுகளையும் இணைக்கும் ரயில்பாதை திட்டமும், பொருளாதார மையங்களும்  அடங்கும்.

எழுபது ஆண்டுகளாக பிரிந்து வெறுப்புணர்வு சூழ வாழும் கொரிய நாடுகளிடையே இத்திட்டங்கள் புது மறுமலர்ச்சியை ஏற்படுத்தக்கூடும். வடகொரியாவுடன் இணைந்து தென்கொரியா செய்யும் திட்டங்களுக்கு அமெரிக்காவின் ஆதரவு கிடைக்குமா என்பது சந்தேகமே. ஜூன் மாத சந்திப்பிற்கு பிறகு கிம் ஜாங் உன், ஆயுதங்களை குறைப்பது தொடர்பாக என்ன நடவடிக்கைகள் எடுத்தார் என்பதை இன்னும் அவர் தெரிவிக்கவில்லை. ஜப்பானின் பிடியிலிருந்து விடுபட்டு இரு கொரிய நாடுகளும் விடுதலை பெற்ற தேசிய சுதந்திரதினத்தில் அமைதி பொருளாதாரதிட்டங்களை அறிவித்துள்ளார் மூன். "அரசியல்ரீதியான ஒற்றுமைக்கு முன்பு பொருளாதாரரீதியிலான வளர்ச்சியால் இருநாடுகளும் தம்மை தக்கவைத்துக்கொள்வது குறித்து யோசிக்கவேண்டும்" என்கிறார் அதிபர் மூன். ரயில்பாதை அமைந்தால் தென்கொரியாவிற்கு ரஷ்யா, சீனாவிலிருந்து எளிதாக எரிபொருட்கள் கிடைப்பதோடு ஐரோப்பாவுக்கும் பொருட்களை எளிதாக அனுப்ப முடியும். வடகொரியாவிடம் தென்கொரியா அதிபர் கெஞ்சுகிறார் என எதிர்க்கட்சிகள் விமர்சித்தாலும் நாட்டில் நிலவும் வேலைவாய்ப்பு பிரச்னைகளை சமாளிக்க மூன், இணையும் திட்டங்களை செயல்படுத்த தொடங்கியுள்ளார்.